Allahın daha tez cavab verdiyi ay

                                              Allahın ayı “Rəcəb”

Rəcəb ayının 1-i üç müqəddəs ayın (Rəcəb, Şaban, Ramazan) başlanğıcıdır. Rəcəb ayının 1-i İmam Məhəmməd Baqirin mövlud günüdür.

Rəcəb ayının ilk gecəsinin əməlləri və fəzilətləri; Allahın daha tez cavab verdiyi ay

Rəcəb ayı sadəcə təqvimdə bir zaman kəsiyi deyil, Allahla yeni bir söhbətin başlanğıcıdır. Rəvayətlərdə “Allahın ayı” adlandırılan bu ayda rəhmət və bağışlanma qapıları həmişəkindən daha tez açılır. Rəcəb ayının ilk gecəsi bu fürsətin başlanğıcıdır; tövbə, dua və insanın yolunu Ramazana qədər dəyişə biləcək yeni qərarlar üçün bir imkan.

Qəlblərin təqvimində bəzi aylar sadəcə ad deyil, bir görüş vaxtıdır. Rəcəb də həmin zamanlardandır. Ramazandan əvvəl gəlir ki, qəlbi hazırlasın, tozu-torpağı silsin və insanı tədricən Allaha doğru qaytarsın. Əhli-beyt (ə) Rəcəbi “Şəhrullah” – Allahın ayı adlandırıblar; Allaha nisbəti digərlərindən daha yaxındır. Rəcəb ayının ilk gecəsi bu ilahi qonaqlığın başlanğıcıdır və səmanın qapılarının daha açıq, duaların isə daha tez eşidildiyi bir gecədir.

Niyə Rəcəb “Allahın ayı” adlanır?

Rəvayətlərdə Peyğəmbər (s) buyurur:
“Rəcəb Allahın ayıdır, Şaban mənim ayımdır, Ramazan isə ümmətimin ayıdır”.
Bu ifadə Rəcəb ayının xüsusi mövqeyini göstərir. Bu ay tövbə, istiğfar və Allaha dönüş ayıdır. Rəcəb nə Ramazan kimi vacib əməllərlə doludur, nə də Şaban kimi salavat və dua ilə. Rəcəb qəlbin saflaşdırılması ayıdır.

İmamlar (ə) vurğulayıblar ki, Rəcəb bəndəliyin məşq ayıdır. Bu ayda qəlbini təmizləyən insan Ramazanı daha asan keçir. Sanki Allah Rəcəb ayında deyir: “Qayıt, yol hələ açıqdır”.

Rəcəb ayının ilk gecəsi – bağışlanmanın başlanğıcı

Rəcəb ayının ilk gecəsi adi bir gecə deyil. Rəvayətlərə görə, bu gecə mələklər bəndələr üçün dua edər, Allah isə onlara xüsusi diqqət göstərər. Bu gecə niyyət gecəsidir, dəyişmək, günahı tərk etmək və daha yaxşı olmaq niyyəti.

Bu gecənin ən mühüm əməlləri

1. Qüsl – zahiri və batini paklıq niyyəti ilə

2. “Məfatih”də bu gecə üçün qeyd olunan müstəhəb namazlar

3. İstiğfar və tövbə – “Əstəğfirullahə və əs’əluhut-tövbə” zikrini qəlbən demək

4. Özümüz və başqaları üçün dua etmək; çünki bu gecə dualar daha tez qəbul olunur

Rəcəb ayının ilk gecəsi yeni bir qərarın yazıldığı gecədir və hətta bu qərar əvvəllər dəfələrlə pozulmuş olsa belə.

Rəcəb – davamlı istiğfar ayı

Rəcəb ayının məşhur zikrlərindən biri bu qısa, amma dərin cümlədir:
“Əstəğfirullahəl-ləzi la ilahə illa huvə, vəhdəhu la şərikə ləh, və ətubu iləyh”.

Rəvayətlərdə buyurulur ki, Rəcəb ayında çox istiğfar edən insan Allahın xüsusi rəhmətinə nail olar. Bu ayda istiğfarın özü ibadətdir, hətta dil qəlbdən öndə olsa belə. Rəcəb bizə öyrədir ki, Allah bizim dəfələrlə geri dönməyimizdən usanmaz.

Rəcəb ayında oruc – oddan qoruyan qalxan

Rəcəb ayının orucları müstəhəbdir, amma savabı çox böyükdür. Bir hədisdə buyurulur ki, Rəcəb ayında bir gün oruc tutmaq insanı cəhənnəm odundan bir il uzaqlaşdırar. Kimsə bütün ayı oruc tuta bilmirsə, ən azı ayın ilk cümə axşamını, ortasını və ya sonunu əldən verməməsi tövsiyə olunur. Rəcəb az yemək ayı deyil, az günah etmək ayıdır. Oruc bu məşqin yalnız bir vasitəsidir.

Dua və münacata xüsusi diqqət

Rəcəb ayında duanın xüsusi yeri var. İmamlar (ə) tövsiyə ediblər ki, bu ayda Allahla daha çox danışın, hətta mətnsiz, öz sözlərinizlə. “Ya mən ərcihu li-kulli xayr” duası, qısa gecə münacatları və aqibətin xeyirli olması üçün dualar bu ayda çox tövsiyə olunur.

Rəcəb – günahı tərk etmə ayı

Rəvayətlərdə vurğulanır ki, Rəcəb ayında günah daha çirkin, itaət isə daha savablıdır. Əhli-beyt (ə) buyurublar: Əgər böyük iş görə bilmirsinizsə, heç olmasa günahı tərk edin. Rəcəb ayının ən böyük əməli budur; dili qeybətdən saxlamaq, gözü nəzarətdə tutmaq, qəlbi kin-küdurətdən yüngülləşdirmək. Rəcəb bəzi işləri etməmək ayıdır və məhz bu, insanı irəli aparır.

Rəcəb – Şaban və Ramazanın müqəddiməsi

Rəcəb bir körpüdür, gündəlik həyatla Ramazan arasında körpü. Rəcəbdən keçən insan Şabanı daha yaxşı anlayar, Ramazanı isə daha dərin yaşayar. Əslində Rəcəb ayı bir oyadıcı zəngdir, sakit, amma ciddi bildiriş kimidir. Allah bu ayda bəndələrini çağırır. Bəziləri tez cavab verir, bəziləri gec, amma qapı hər zaman açıqdır.

Rəcəb ayından faydalanmaq

Əgər bu aydan faydalanmaq istəyiriksə bəzi işləri kənara qoyub ayın fəzilətlərindən yararlanmalıyıq. Ağır proqram qurmağa ehtiyac yoxdur. Hər gün bir neçə dəqiqə istiğfar etmək, həftədə bir gün oruc tutmaq, gecələr qısa bir dua oxumaq və bir günahı tərk etmək üçün ciddi qərar vermək kifayətdir. Bunlar Rəcəbi təqvim ayından həqiqi bir aya çevirir.  Rəcəb ayı sakit, səs-küysüz gəlsə də fürsətlərlə doludur. Bəlkə də ən yaxşısı onun dəvətini ciddiyə almaqdır. Çünki Allah bəndələri üçün bu müqəddəs ayı onlara xeyir, faydalarla dolu ərməğan edib. Allah Rəcəb ayının fəzilətli günlərindən faydalanmağı bizə nəsib etsin!